O Concello de Pontedeume informa á veciñanza que desde este momento queda prohibido o consumo de auga potable ata novo aviso pola situación das augas do Eume.
Tendo en conta os datos que arroxa a última analítica realizada por Viaqua hai unhas horas das augas que o Concello capta do Eume para consumo humano, na que se constata que o nivel de turbidez aumentou dende onte ata superar o máximo establecido no Real Decreto Lei 140/2003 de Calidade das Augas, e sendo imposible chegados a este punto que os procesos levados a cabo na pranta potabilizadora municipal poidan garantir a calidade das mesmas, vémonos na obriga de prohibir o seu consumo. Poderá utilizarse para fregar ou lavarse, pero non para consumir.
Dende que se detectou esta situación no río hai ahora cinco días, dende o Concello e a través da empresa que xestiona o servizo municipal de augas, Viaqua, véñense realizando de forma continua tanto analíticas das augas que captamos do Eume, como controles das mesmas na pranta potabilizadora durante as 24 horas do día. A situación da turbidez das augas comezou a emporar na tarde de onte, superando na mañá de hoxe os límites establecidos para o consumo humano.
O Concello, a través da Policía Local, puxo en coñecemento do ente Augas de Galicia, responsable da conca do río e da calidade das augas do mesmo, a situación do Eume a principios de semana. Esta mesma mañá e ante a situación descrita con anterioridade, dende Viaqua remitiuse informe a Sanidade indicando que “con motivo dos verquidos existentes ao río Eume, que se veñen producindo en continuo ao longo de toda a semana e que están a alterar a súa calidade e características morfolóxicas, ante o aumento da turbidez das mesmas nas últimas 24 horas, a ETAP municipal non está capacitada para garantir en continuo que a calidade da auga sexa apta para consumo”.
Esta turbidez existente no punto de captación do Eume, que oscila entre 70-100 NTU, altera as características morfolóxicas do río e a ETAP non está deseñada para poder tratar estes valores tan altos, existindo por tanto a consecuencia de incumprir os niveis de turbidez establecidos no R.D 140/2003, que regula os parámetros de calidade de auga de consumo.
Dende o concello lamentamos a situación, os perxuicios á cidadanía xerados pola mesma, e traballa conxuntamente con Viaqua e o ente Augas de Galicia para atopar unha solución o antes posible.