Os concellos das comarcas de Ferrol, Eume e Ortegal decidiron unir forzas ante a situación que atravesa o transporte público e as deficiencias que se están a producir no servizo. Nunha xuntanza de traballo celebrada en Pontedeume, representantes municipais acordaron reclamar explicacións á Administración e impulsar unha resposta coordinada entre os territorios afectados.
Na reunión participaron, ademais do goberno local de Pontedeume, representantes dos concellos de Fene, A Capela, Narón, Monfero, Neda e Valdoviño. Os municipios asistentes tamén fixeron un chamamento aos concellos que non puideron acudir para que se sumen a esta iniciativa común.
Reclamacións á Administración
Entre os acordos adoptados figura a solicitude de convocatoria da Mesa da Comisión de Seguimento da licitación do transporte, co propósito de analizar a situación actual, coñecer as explicacións da Administración e reclamar solucións ás deficiencias detectadas.
Os concellos tamén pedirán unha reunión comarcal coa Dirección Xeral de Mobilidade, na que estean representados os municipios afectados, para abordar os problemas do servizo e avanzar na procura de respostas.
Coordinación cos colectivos afectados
Os acordos da xuntanza trasladaranse á Plataforma por un Transporte Digno de Ferrolterra e ao Foro Cidadán polo Ferrocarril de Ferrol, Eume e Ortegal, co obxectivo de coordinar actuacións e ampliar a participación social.
Os concellos tamén consideran importante implicar neste proceso os sindicatos, o estudantado e os distintos colectivos afectados polas deficiencias do transporte público.
Non se descartan mobilizacións
Os municipios participantes sinalan que non descartan ningunha vía de mobilización para reclamar melloras no servizo, incluída a posibilidade dunha folga comarcal polo transporte.
A iniciativa busca reforzar a cooperación entre os concellos e trasladar unha reivindicación compartida ante os problemas que afectan á mobilidade da veciñanza das comarcas de Ferrol, Eume e Ortegal.