A Casa da Cultura de Pontedeume acolleu este sábado, 28 de xaneiro, a gala de entrega de galardóns aos deportistas eumeses máis destacados das últimas tempadas. Un acto moi especial no que se tivo a oportunidade, como lembrou o edil de Deportes, Joshua Dopico, “de poder mostrar e recoñecer o esforzo e sacrifico das nosas e nosos deportistas; así tamén como o loable traballo por parte da xente que de maneira totalmente desinteresada, dedica horas e horas ó longo de todo un ano para poder manter ás entidades no máis alto do panorama deportivo”.
Ademáis dos deportistas premiados, familiares, amigos, compañeiros de club, adestradores e directivos abarrotaron a sala do antiguo convento de San Agustín onde se entregaron os galardóns. Realizáronse mencións especiais por parte dos clubes, mencións especiais por parte do Concello de Pontedeume, galardoadas e galardoados por parte dos clubes e se rematou o acto cas entregas dos galardóns ós mellores deportistas das tempadas 2020 e 2021. O alcalde da vila, Bernardo Fernández, así que outros membros do goberno e da corporación, foron os encargados de entregar os recoñecementos aos atletas eumeses.
O rexedor local quixo pór o foco no traballo que realizan os clubes “sen os cales —dixo— non sería posible a supervivencia destas entidades deportivas” que tantos éxitos individuais e colectivos teñen colleitado. Bernardo Fernández tamén puxo en valor o talento local: “Non é normal que nunha vila deste tamaño haxa tantos deportistas de élite e que teñan obtido tan bos resultados en competición autonómicas, nacionais e mesmo internacionais. O vencello de Pontedeume co deporte é moi especial”.
O palista do Club Náutico Firrete de Pontedeume, Santiago Cruz, levou o premio ao mellor deportista do ano 2020, mentres que a judoca June Moreno, do AD Judo Ferrolterra, obtivo o mesmo galardón como mellor deportista do ano 2021. Nas mención especiais por parte dos clubes, os galardoados foron Xulio Abelleira (ADC Monte Breamo), Miguel Fontán (Eume Deportivo), o conxunto alevín do Club Acordes e Julio Varela (Escola Judo Pontedeume). As mencións especiais por parte do Concello de Pontedeume foron para o loitador de grappling Ramón Placer e o fondista Juan Bedoya.
Os propios clubes da vila tamén quixeron recoñecer o talento local e outorgaron os correspondentes galardóns a Rubén Tenreiro (ADC Monte Breamo), Mara Iglesias (Club Acordes Pontedeume), Iker Veiga e Antón Cao (CN Firrete), Sabela Daviña e Eva González (CN Firrete), Eume Deportivo Xuvenil, o equipo sénior do Eume Deportivo, Miguel Portela e June Moreno (Escola Judo Pontedeume) e César Filegueiras e Pablo López (Club Balonmán Pontedeume).
