O Concello de Pontedeume anunciou este martes o inicio das obras de pavimentación da rúa da Igrexa, unha intervención destinada a mellorar o acceso á igrexa de Santiago mediante a substitución do firme actual por granito moreno, unha solución máis segura e acorde co entorno histórico.
A actuación está financiada pola Asociación de Concellos do Camiño Inglés, entidade da que Pontedeume forma parte. Unha vez concluídos os traballos, o goberno local prevé avanzar na peonalización da praza de San Roque, un proxecto ligado á mellora dos espazos públicos do centro urbano.
Co avance das obras, o Concello tamén informou de que a partir do xoves 27 de novembro e ata a finalización dos traballos —prevista antes do Nadal— non se poderá estacionar no atrio da igrexa. A medida é temporal, pero necesaria para facilitar o desenvolvemento das tarefas.
O alcalde de Pontedeume e presidente da Asociación de Concellos do Camiño Inglés, Bernardo Fernández Piñeiro, subliñou que a mellora da accesibilidade nesta área era “unha prioridade”. “Agora esta mellora xa está en marcha”, destacou.
Pola súa banda, o concelleiro de Urbanismo, Daniel Ríos, lembrou que a intervención “mellorará considerablemente o acceso á igrexa e, en xeral, o tránsito por unha zona moi frecuentada pola veciñanza”. Tamén pediu comprensión polas molestias que poida causar a prohibición temporal de aparcamento no atrio.
