A Casa da Cultura de Pontedeume acollerá este martes 25 de novembro, ás 20:00 horas, a presentación do novo libro da ensaísta Aurora Marco, titulado ‘María Vázquez, a mestra socialista eliminada polo franquismo’. O evento está organizado pola librería Áncora, a editorial Alvarellos e o Concello de Pontedeume.
Na presentación participarán, ademais da autora, o alcalde Bernardo Fernández Piñeiro, a concelleira de Cultura Alejandra Bellón e o editor Henrique Alvarellos.
Bellón salientou que o 25N, Día Internacional da Eliminación da Violencia contra as Mulleres, é “a ocasión perfecta” para dar a coñecer esta obra sobre María Vázquez, “unha mestra comprometida e adiantada ao seu tempo, asasinada por un franquismo intrinsecamente reaccionario e machista”.
María Vázquez, nacida en Sober, formouse na Coruña e exerceu como mestra na Pobra de Caramiñal e en Miño. Participou activamente na reforma pedagóxica da época e mantivo unha intensa implicación política e sindical, chegando a ser vogal da executiva da Agrupación Socialista de Pontedeume.
Tras o golpe de Estado de 1936, foi detida polo bando franquista acusada de defender a escola laica e o amor libre. Pasou polo cárcere de Pontedeume antes de ser fusilada en Miño poucos días despois.
O alcalde Bernardo Fernández Piñeiro convidou á veciñanza a asistir a este acto “fundamental para manter viva a memoria histórica da vila e, en particular, a das mulleres que se enfrontaron ao fascismo e sufriron a máis brutal represión”.