A ponte da AC-862 en Cornide é a principal vía de comunicación a pé entre este núcleo e o centro urbano. De feito, aló polo 2008, a Xunta de Galicia como titular da estrada construiu unha senda peonil de 1 Km pola marxe dereita que enlaza coas beirarrúas do Casal. Incluso se colocou unha pasarela de madeira de case 100 metros de lonxitude para salvar o ribazo do mesón O Muíño do Pepe (o antigo muíño de Mera).
Falta de accesibilidade e seguridade
A obra mellorou a seguridade das ducias de viandantes que percorren a zona cada día, pero quedou algo pendente: facer máis accesible xusto o tramo da ponte sobre o Xubia, por onde cómpre pasar de unha en unha persoa e por onde non poden cruzar cadeiras de rodas.
O Concello xa manifestara a necesidade dunha solución en conversas informais con responsables da demarcación de estradas da Xunta e hai uns días remitíuselle a AXI -Axencia Galega de Infraestruturas- unha carta solicitando formalmente que se lle dea ao paso da ponte o mesmo ancho que ten o resto da senda peonil.
No escrito explícase que os pasos peonís da ponte «son moi estreitos e só permiten o paso dunha persoa», razón pola que supoñen «un obstáculo importante, que dificulta a mobilidade e mesmo pode xerar situacións de perigo».
Solucións ao problema
Corrixir o problema só ten como solución ampliar a plataforma nuns centímetros, o que permitiría incrementar considerablemente o ancho para o paso de viandantes. A petición do Concello céntrase en que a axencia de infraestruturas busque unha solución para este tramo de 20 metros, que supón un embude e un problema grave de accesibilidade nun percorrido de case un quilómetro de distancia.
A senda peonil da AC-862 é unha vía moi empregada pola veciñanza da zona para os seus desprazamentos diarios, pero tamén é lugar frecuentado por paseantes e deportistas que despois proseguen o seu camiño polo paseo fluvial do Xubia.
Cando se fixo a senda peonil houbo que solventar outro problema: facer un paso que salvase o desnivel ao pé do antigo muíño de Mera. A solución técnica adoptada pola Xunta foi construír unha estada de madeira tratada que nos últimos tempos requiriu varias operacións de mantemento, asumidas integramente polo Concello. A última, hai tan só uns días, obrigou a substituír varias táboas do chan que ameazaban con esfondarse. Segundo o alcalde, Secundino García, «a plataforma de madeira é unha infraestrutura de titularidade autonómica, polo que debería ser a AXI quen se encargase de mantela en perfectas condicións».
