A Área Sanitaria de Ferrol xa está a facer as probas de detección da Covid-19 a profesionais do ámbito da Educación. Para a súa execución habilitouse un terceiro punto físico no interior do Hospital Novoa Santos do Complexo Hospitalario Universitario de Ferrol.
Onte realizábanse as 200 primeiras probas, e hoxe xa se establece a dinámica actual de realizar unha media de 200 probas diarias en horario de mañá e tarde, ata alcanzar as máis de 2.300 probas previstas na Área Sanitaria de Ferrol, durante aproximadamente doce días. Un total de seis profesionais da Área Sanitaria, dúas profesionais de Enfermaría e unha celadora desenvolven esta actividade de cribado
O cribado realízase mediante test rápido de anticorpos de dobre banda ó persoal dos distintos centros educativos da Área co obxectivo de determinar as posibles infeccións por Covid antes de dar comezo o curso escolar.
Tres puntos de mostras no Novoa: dous no automóbil e un persoal
O Hospital Novoa Santos conta neste intre con tres puntos de toma de mostras: dúas carpas de acceso co automóbil no que se realizan as probas PCR, e un activado onte martes 25 de agosto no interior do edificio no que se acode persoalmente.
Nos puntos do automóbil traballan na actualidade un total de 14 persoas -sete equipos formados por enfermeira e Técnica de Coidados Auxiliares de Enfermaría-, os cales acudirán ós domicilios en caso de ser necesario.
Agradecementos e precaución
Dende a Área Sanitaria de Ferrol quérese reiterar novamente o agradecemento pola implicación, traballo, responsabilidade e compromiso de cada un dos profesionais sanitarios e non sanitarios. Un agradecemento tamén á poboación polo seu esforzo e á que hoxe se lle pide o máximo coidado e precaución, xa que de todos e cada un de nós depende o coidado das medidas para evitar a transmisión deste coronavirus. Non podemos baixar a garda, porque todos temos que coidar de todos neste intre. É necesario evitar as aglomeracións e ser moi rigoroso co lavado de mans, co emprego da máscara, e co mantemento da distancia social.
