O consello de administración da Autoridade Portuaria de Ferrol-San Cibrao deu luz verde á adxudicación das obras para a rehabilitación da antiga Comandancia Naval na reunión que mantivo esta mañá.
Esta actuación, que conta un investimento de 1,3 millóns de euros, é parte do proxecto do ente que preside Jose Manuel Vilariño para poñer en valor a fachada marítima da cidade, xunto con outras dúas que se atopan en trámites: a recuperación do vello edificio de Aduanas e a desafectación da Casa do Mar.
Entre outras intervencións, o proxecto de rehabilitación da Comandancia Naval, que ten un prazo de execución de 21 meses, co que estará concluído a finais do verán de 2022, inclúe o baleirado do seu interior para executar unha nova estrutura, a mellora da accesibilidade, o cambio de carpinterías, o embelecemento da fachada, a escavación no soto para sanear soleiras e eliminar humidades, a substitución da cuberta de fibrocemento por unha acabada en zinc e a eliminación de volumes impropios encostados ao inmoble, como os da parte posterior e o situado sobre a lanterna.
Integración na sede da Autoridade Portuaria
Unha vez que conclúan os traballos que executará a Unión Temporal de Empresas -UTE- entre Comsa e Ogmios Proxecto, o emblemático inmoble construído en 1931 integrarase coa actual sede da Autoridade Portuaria, dando así lugar a un único edificio con dous bloques conectados polas súas plantas baixas e unidos polos semisótanos.
Esta solución arquitectónica permitirá paliar os problemas de espazo que ata a data impediron dar resposta óptima ás necesidades de persoal e usos que foron xurdindo co paso dos anos.
Segunda fase do PIF
No consello desta mañá tamén se deu conta, entre outras cuestións, da adxudicación das obras para a construción da segunda fase do PIF -Posto de Inspección Fronteriza- en Caneliñas. A acta de reformulo dos traballos, que levará a cabo a UTE SAA- Construcións Sierra, asinouse esta mesma semana e estarán concluídos nun prazo de cinco meses.
O investimento nesta actuación que será clave para continuar gañando tráficos para o consumo animal ou humano desde países de fóra da Unión Europea alcanza os 540.000 euros
