A Federación Galega de Alimentación, Mar, Transporte, Téxtil, Telecomunicacións e Actividades Afíns da CIG de Ferrol, esíxelle á Consellaría do Mar que adopte de xeito inmediato as medidas precisas para que a Ría de Ferrol volva ser un piar fundamental na economía da comarca.
A Ría de Ferrol, piar básico da comarca
O saneamento integral da Ría de Ferrol é unha necesidade que non pode esperar, pois de non se levar a cabo de xeito inmediato e decidido afondarase no abandono deste piar básico da economía da comarca. É por iso que dende a CIG demandan á Xunta a elaboración dun Plan Integral de recuperación da Ría de Ferrol para o marisqueo.
«Mentres non se arbitran estas medidas é preciso tamén darlle cobertura económica ás persoas que viven do sector e que están neste momento totalmente desprotexidas e abandonadas pola administración, subliñan dende a A Federación Galega de Alimentación, Mar, Transporte, Téxtil, Telecomunicacións e Actividades Afíns da CIG.
Dende a entidade loitan porque a Ría de Ferrol volva ser unha base da economía da comarca que permita vivir de xeito digno as persoas que se dedican a esta actividade. «O deixamento e a incapacidade da Xunta de Galicia para enfrontar de raíz os problemas da Ría non son novidosos, pois o sector tense visto abocado historicamente a este desleixo por parte da administración autonómica», destacan.
