A Deputación achega 3,4 millóns ás comarcas para facer fronte aos gastos socias da crise sanitaria

A Deputación da Coruña aprobou hoxe por unanimidade, no primeiro pleno telemático da súa historia, destinar 19 millóns de euros para apoiar os concellos coruñeses na loita contra o COVID-19 e axudar a paliar os seus efectos sociais e económicos. As comarcas de Ferrol, Eume e Ortegal recibirán, en total, máis de 3,4 millóns.

Os fondos, procedentes de superávit e remanentes de tesourería, chegarán aos concellos a través do Plan Único (POS+2020), do cal se modificaron as súas bases para adaptalas á crise sanitaria, que provoca que os concellos teñan que realizar importantes gastos imprevistos, fundamentalmente na área social. “O Plan Único será este ano máis social que nunca”, afirmou o presidente da Deputación, Valentín González Formoso, que agradeceu o apoio unánime de todos os grupos políticos da corporación provincial para modificar as bases. “Creo que estamos dando un bo exemplo á sociedade cando se necesita máis que nunca”, afirmou.

González Formoso explicou unha parte do aprobado hoxe “terá como destino exclusivo financiar gastos sociais extraordinarios derivados do COVID-19 como a adquisición de equipos de protección individual (EPI) ou o reforzo dos servizos municipais de axuda a domicilio para maiores, dependentes ou persoas con discapacidade”. Os concellos percibirán as achegas económicas da Deputación de maneira inmediata, sen ter que agardar a xustificar o investimento.

O resto da partida poderá ser usados polos concellos para o financiamento dos seus servizos básicos (gasto corrente) ou para obras financeiramente sostibles, contribuíndo así a dinamizar a economía e o emprego local. Como é habitual, serán os propios municipios os que decidan o destino dos fondos en función das prioridades particulares de cada un.