A alcaldesa de Narón, Marián Ferreiro, e outros membros do goberno local desprazáronse esta mañá á Praza da Gándara e á Praza 23 de Novembro, na Solaina, para visitar os dous corredores activos instalados en zonas públicas da cidade.
Os corredores activos da Gándara e A Solaina complementan aos instalados tanto no interior dalgúns centros educativos da cidade como no exterior –nos colexios do Val e Ponte de Xuvia-, e que se dirixen a alumnado de educación Infantil e Primaria.
A través dun percorrido deseñado especificamente para a ocasión os menores dispoñen dunha zona de saída para camiñar sobre un tramo con semáforos, pasos de peatóns, túneles, animais, sinais de tráfico e indicacións sobre a igualdade, a reciclaxe, e co novo contedor orgánico de cor marrón que en pouco tempo se comezará a instalar na cidade.
O proxecto dos Corredores activos iniciouse en Narón no ano 2018 e na actualidade divídese en tres áreas: os corredores dos centros de ensino, a aprendizaxe a través dunha actividade de robótica cun robot educativo e unha alfombra que están nas aulas e, dende agora, con dous corredores en espazos públicos da cidade. As nenas e nenos realizan actividade física desenvolvendo dun xeito lúdico as súas capacidades psicomotrices e, ao mesmo tempo, as intelectuais, realizando o que para eles é unha especie de xogo dun xeito autónomo.
A alcaldesa quixo destacar destas iniciativas a forma de poder contaar coa Educación Viaria tamén fóra das aulas, complementando así á formación dos colexios e concienciando ás nenas e nenos sobre a importancia de respectar os sinais de tráfico, fomentar a igualdade e tamén o coidado do medio ambiente.
