O último boletín mensual do paro publicado polo Servizo Público de Emprego Estatal (SEPE) deixa un panorama estable en canto ao emprego na comarca de Ferrolterra, que só aumentou en cinco persoas o número de desempregados respecto ao mes de agosto, deixando un balance total de 11,188 demandantes de traballo. Ao igual que no resto de Galicia foi o sector industrial o que conseguiu soster a caída do paro, grazas aos máis de 300 novos contratos que se formalizaron neste periodo. Só na cidade de Ferrol se crearon 146 postos de traballo no sector da industria. De feito, na cidade departamental, así como en Fene, o desemprego descendeu en 13 e 32 persoas, respectivamente.
A outra cara da moeda atópase nas comarcas de Eume e Ortegal, que no lograron deter o efecto estacional do mes de agosto e viron incremento o seu número de desempregados. O Eume suma 65 novos parados ata alcanzar os 1.270, un 5,39% máis. Destes, 843 son do sector servizos que foi onde se destruíron máis contratos co fin da estación estival. Un caso similar ocorreu no Ortegal, onde no mes de setembro os demandantes de emprego aumentaron en 49 persoas ata as 603, o que supón un aumento dun 8,84% . Máis da metada, 390, pertencen ao sector servizos.
Aínda con todo o panorama continúa a ser negativo se o comparamos coas mesas datas do pasado ano. En Ferrolterra, en setembro de 2019 había 1.155 parados menos, no Eume 189 menos e no Ortegal a taxa interanual vaise ata os 108, case un 22% máis.
| CONCELLO | PARADOS SETEMBRO | PARADOS AGOSTO | VARIACIÓN |
| CABANAS | 175 | 162 | 13 |
| CAPELA, A | 48 | 48 | 0 |
| MONFERO | 50 | 52 | -2 |
| PONTEDEUME | 492 | 461 | 31 |
| AS PONTES |
505 |
482 |
23 |
| Total | 1,270 | 1,205 | 65 |
| ARES | 393 | 379 | 14 |
| CEDEIRA | 373 | 353 | 20 |
| FENE | 868 | 900 | -32 |
| FERROL | 5,489 | 5,502 | -13 |
| MOECHE | 50 | 49 | 1 |
| MUGARDOS | 365 | 363 | 2 |
| NARÓN | 2,743 | 2,719 | 24 |
| NEDA | 316 | 319 | -3 |
| SAN SADURNIÑO | 151 | 151 | 0 |
| SOMOZAS, AS | 60 | 58 | 2 |
| VALDOVIÑO | 380 | 390 | -10 |
| Total | 11,188 | 11,183 | 5 |
| CERDIDO | 68 | 58 | 10 |
| MAÑÓN | 42 | 29 | 13 |
| ORTIGUEIRA | 301 | 285 | 16 |
| CARIÑO | 192 | 182 | 10 |
| Total | 603 | 554 | 49 |
