Dende onte 5 de agosto as tres dependencias municipais dependentes da concellería de Benestar Social volven atender á cidadanía de luns a venres. A epidemia da Covid-19 motivou que, seguindo un protocolo técnico, estas oficinas permanecesen abertas ao público unicamente un día ou dous á semana.
Estas instalacións acollen as catro unidades básicas de traballo social -a número 1 no Edificio Social, a 2 no centro cívico de Caranza e a 3 e a 4 na Casa Solidaria-, que a partir deste momento retomarán a súa actividade normal, con cita previa, tal e como se viña facendo tradicionalmente.
Debido ás especiais circunstancias de saúde pública que se viven nestes momentos, o Concello dispuxo un control de accesos a todas estas dependencias. Así, as persoas que precisen concertar unha cita deben poñerse en contacto coa correspondente unidade e solicitala.
