O Concello de Cedeira vén de editar un folleto informativo para dar a coñecer os recursos de información e atención especializada en casos de violencia contra as mulleres. A publicación, de tamaño reducido para poder levala comodamente mesmo xunto á funda do teléfono móbil, recolle números de contacto, páxinas web e aplicacións útiles para solicitar axuda e reforzar a seguridade.
A iniciativa está dirixida tanto ás mulleres que sofren violencia como a calquera persoa que coñeza ou sospeite dunha situación deste tipo. A través da mensaxe «Non estás soa», o Concello anima a pedir axuda e facilita información sobre os servizos dispoñibles.
Teléfonos de atención e recursos especializados
O Concello editou 1.000 exemplares da guía, que inclúe teléfonos de emerxencias e información de contacto dos Centros de Información á Muller de Ortigueira e Ferrol.
Tamén incorpora datos de servizos de atención permanente, como o Centro de Crise de Ferrol e o 016, o servizo do Goberno central para atender as vítimas de violencia contra as mulleres.
Ademais, o folleto conta con códigos QR para acceder á páxina web da Delegación do Goberno especializada nesta materia e á aplicación AlertCops, das forzas e corpos de seguridade, que ofrece diferentes funcionalidades destinadas a reforzar a seguridade das mulleres.
Dispoñible en dependencias e instalacións públicas
O folleto, que unha vez dobrado mide 7,4 × 10,4 centímetros, está a disposición da cidadanía en distintos puntos do municipio.
Entre os lugares onde se pode recoller figuran o Concello de Cedeira, o centro de saúde, os Servizos Sociais, as oficinas da Policía Local e o posto da Garda Civil, ademais doutras dependencias e instalacións públicas.
Con esta publicación, o Concello busca facilitar o acceso á información e aos recursos de apoio, para que tanto as posibles vítimas como as persoas da súa contorna saiban onde acudir ante unha situación de violencia contra as mulleres.