A Policía Local de Cedeira quixo agradecer publicamente o comportamento exemplar e solidario dun veciño da localidade que devolveu un sobre con máis de dous mil euros ao seu lexitimo propietario. Un veciño da localidade denunciou estes días en dependencias policiais extraviar un sobre cunha gran cantidade de diñeiro proveniente da venda dun monte.
O sobre unicamente levaba anotada a cantidade exacta que contiña escrita no exterior do mesmo. Sen nome nin outros datos. Ao día seguinte de extravialo, outro veciño da localidade púxose en contacto coa Policía Local para informar dun achado dun sobre con diñeiro no seu interior. Os axentes puxeron en contacto a ambas as persoas e produciuse a devolución desta importante cantidade de diñeiro.
