O Concello de Ferrol puxo á venda esta semana na web do teatro Jofre (http://www.ferrol.es/jofre/Paginas/SelEvento.aspx) as entradas para varios espectáculos que terán lugar na cidade nos próximos días e que forman parte da programación cultural presentada a mediados de mes de cara ao segundo semestre do ano.
Programación cultural no Jofre
Un deles é «Leira», de Nova Galega Danza, que terá lugar mañá sábado 26 de setembro, ás 20.30 horas, no teatro Jofre. Trátase dunha das compañías galegas con maior proxección nacional e internacional que chega a Ferrol cun espectáculo de danza e música que mostra o sacrificio dos labores no campo.
Tamén están á venda as entradas para unha das recomendacións deste ano da Red Española de Teatros, Auditorios, Festivales y Espacios de Titularidad Pública, «Tour Vacanal 2020», da compañía De Vacas. Poderase gozar o próximo 3 de outubro, ás 20.30 horas, no teatro Jofre, nun concerto con humor que combinará música, ironía, frescura, talento e creatividade.
Pola súa banda, o día 11 de outubro, ás 19.30 horas, chegará tamén ao Jofre a obra teatral «Óscar, el niño dormido», da compañía El Espejo Negro. Dita representación forma parte tamén das recomendacións formuladas pola Red Española de Teatros, Auditorios, Festivales y Espacios de Titularidad Pública ademais de estar premiada co premio Max. Trátase dun espectáculo familiar moi emotivo posto que aborda con especial sensibilidade a realidade que envolve a un pequeno que tras un golpe quedou en estado de coma.
Tamén se poden adquirir as entradas para o concerto folk de Sheila Patricia Banda, que terá lugar o día 16 de outubro, ás 20.30 horas, no teatro Jofre, cun estilo orixinal e fresco como sinais de identidade da brillante compositora.
