Na boca da ría cedeirense, a Punta Sarridal alberga un castro e un castelo do século XVIII rodeados dunha paisaxe natural inédita. Na visita a este saínte, poderemos gozar de historia, natureza e vistas impresionantes. Comezando cronolóxicamente na etapa prehistórica, na pista de acceso á Punta Sarridal atopámonos co castro homónimo. O Castro Sarridal ocupa gran parte deste enclave xeográfico e os investigadores sitúano na segunda fase da cultura castrexa (entre os século V-II a.C ata os séculos I-II d.C.).
As primeiras intervencións arqueolóxicas no Castro comezaron no verán de 2017 e, tras catro campañas, deron como resultado a consolidación e restauración do “Monumento con Forno”. Só existen 5 construcións como esta en Galicia, cuxa utilidade eran os baños de vapor, cumprindo unha función socio-lúdica nas saunas castrexas.
Tras esta viaxe á prehistoria, a Punta Sarridal ofrécenos algunhas das mellores vistas da ría de Cedeira. Continuando polo sendeiro no que se atopa o castro, chegaremos ao Faro da Punta Sarridal.
Este faro-baliza enclávase nun rochoso cantil ao que se accede por unha pequena escaleira e se sitúa a 30 metros de altitude respecto do nivel do mar. De volta á zona do Castro, atoparemos unha pista de baixada ata o Castelo da Concepción e nos trasladaremos ata o século XVIII, época da súa construción.
Foron os propios veciños de Cedeira quen demandaron a súa edificación tras o ataque da vila por parte dos ingleses na Guerra de Sucesión austriaca. Logo da súa restauración na década dos 90, o Castelo é accesible ao público e pódense visitar algunhas das súas estancias.
Como funcionaba o Monumento con Forno?
O proceso desta sauna prehistórica comezaba nunha antecámara, unha zona de adaptación con temperatura templada. A continuación, accedíase á cámara onde se tomaban os baños de vapor. Grazas a unha “piscina” ubicada na cámara producíase a calor: botábanse os cantos quentes dende un forno comunicado coa piscina. Toda esta estrutura é recoñecible actualmente grazas ás excavacións arqueolóxicas efectuadas.
Algúns datos útiles para a visita
- O Castro de Sarridal e mais a súa contorna natural son accesibles en calquera momento. Porén, para visitar o interior do Castelo da Concepción é preciso unha entrada gratuita dispoñible na oficina de turismo de Cedeira.Para acceder, o mais recomendable é chegar ata o porto de Cedeira en coche ou a pé e chegaremos ao Castelo da Concepción. Dende alí, poderemos camiñar ata o Castro e a Punta de Sarridal.
- Toda a paraxe natural da Punta Sarridal está incluída na Zona de Especial Protección (ZEC) da Rede Natura 2000, o que nos confirma a importancia da súa biodiversidade. Ademais, recórdanos a importancia de coidar o entorno natural, evitando deixar residuos e respetando a fauna e flora autóctonos.
- O Castro do Sarridal xa vai pola súa sétima campaña arqueolóxica, que finalizou o pasado mes de outubro.
