A campaña de promoción do comercio local que o Concello de Ferrol ten programada no marco do plan de dinamización da economía «Ferrol Cidade Viva» dará comezo exactamente o 7 de outubro, e rematará o 4 de novembro, tal e como anunciou este venres a concelleira de Turismo e Promoción Económica, María Teresa Deus.
Trátase da terceira liña de traballo do plan «Ferrol Cidade Viva», unha iniciativa deseñada polo Concello co fin de impulsar o emprendemento local, ademais de potenciar e dinamizar a economía da cidade. Algunhas das accións que inclúe este plan son formación -actualmente en marcha-, e asesoramento individualizado, co que «pretendemos que cada negocio de Ferrol obteña o maior rendemento dos seus negocios», asegurou a edil.
Tras a posta en marcha destas dous iniciativas, o día 7 comezará a terceira acción, onde se levarán a cabo diferentes fórmulas como sorteos, descontos e premios directos para incentivar as compras a nivel local. A responsable de Promoción Turística engadiu que desde o Concello tamén se promocionarán as vendas cruzadas co fin de activar a economía local e incentivar o consumo.
Unha aplicación para informarse
O programa co que o Concello pretende darlle impulso ao comercio local non deixa de lado os recursos dixitais. Na posta en marcha da gran promoción dos negocios contarase cunha aplicación que terá dúas vertentes: por unha banda, os emprendedores poderán coñecer mellor aos seus clientes e, por outra, estes contarán cunha ferramenta na que consultar descontos nos establecementos, sorteos, premios, incentivos ás vendas cruzadas e incluso os puntos acumulados para beneficiarse de promocións.
O cliente poderá acceder a ela a través dun código QR que estará exposto nos establecementos participantes, tal e como explica a concelleira de Promoción Económica. Neste punto, Deus sinalou que «todo este proceso será moi sinxelo, ese é o noso obxectivo, facer a campaña o máis accesible posible a toda a poboación».
Polo momento xa son preto de 100 os establecementos participantes no programa. Os comerciantes interesados en sumarse a este proxecto poden enviar un correo electrónico a [email protected] e os responsables do plan poñeranse en contacto con eles.
