Delegados da CIG na industria auxiliar de Navantia concentráronse hoxe ás portas do estaleiro de Ferrol para reclamar «os dereitos económicos e sociais dos traballadores das auxiliares» e para que se dote de carga de traballo inmediata aos estaleiros. Os representantes dos traballadores denunciaron a súa «exclusión nas negociacións» para suspenders os seus contratos durante o Estado de Alarma e reclamaron o seu «dereito a poder exercer a negociación colectiva».
«Reclamamos agora o que non puidemos reclamar no seu momento. Reclamamos percibir unha compensación polas diferenzas entre o noso salario e as prestacións por desemprego, e reclamamos tamén cobrar a paga extra de xullo íntegra, así como que non nos desconten vacacións», explicaron nun comunicado.
Por outra banda, os delegados da CIG quixieron tamén relanzar a demanda pola carga de traballo nos estaleiros da ría de Ferrol. «O futuro de toda a comarca en xeral, depende de outro desconfinamento: o produtivo. Non podemos aceptar restricións á capacidade produtiva dos estaleiros da ría. Hai que acelerar a posta en marcha do programa das fragatas, e aproveitar ese impulso para saír ao mercado civil con propostas tecnoloxicamente avanzadas, poñendo en valor turbinas, reparacións, e todas as áreas de negocio presentes na ría dun xeito integrado».
Desde o sindicato nacionalista quixeron facer un chamamento ás outras centrais sindicais para relanzar a demanda de carga de traballo, e impulsar, tamén, outra «pola recuperación dos dereitos económicos do persoal da industria auxiliar que veñen de sufrir un duro golpe».
