Durante a fin de semana, a Policía Local atendeu dous relacionados co ocio nocturno. Patrullas do corpo municipal tiveron que presentarse en dous establecementos que estaban abertos durante a noite. Nun dos casos tratábase dun local situado nas inmediacións da praza Vella, onde, segundo denunciaron os veciños, había varias persoas tocando música con instrumentos. Cando chegaron os axentes, a música xa parara, pero observaron que varios dos presentes dispoñían dun acordeón e varias guitarras.
Todos se atopaban no exterior do negocio, desprovistos de máscaras e consumindo bebidas. Cerca deles tamén había arredor de medio cento de persoas que tampouco portaban máscara e se atopaban bebendo, en moitos casos, en vasos de cristal. Os policías requiriron a presenza do responsable do establecemento para que se fixese cargo da situación, ao que accedeu inmediatamente.
Os axentes tamén foron requiridos en Esteiro cando faltaban poucos minutos para as catro da madrugada da noite do sábado ao domingo, xa que un café-bar do barrio continuaba aberto e soaba música tanto no interior coma no exterior. Ao chegar, os funcionarios do 092 observaron que unha empregada do establecemento estaba servindo consumicións a dous clientes na barra e que na terraza se atopaba un pequeno grupo de persoas sentadas arredor dunha mesa.
Os axentes entrevistáronse coa traballadora para explicarlle os motivos da súa presenza no lugar e indicáronlle que debía cesar a actividade de inmediato, ao que a muller accedeu rapidamente.
