A Universidade da Coruña habilitou diversos espazos wifi para que o alumnado universitario con dificultades de acceso a Internet poida realizar os seus exames online nas instalacións dos seus campus, doutras universidades e nas aulas da Rede CeMIT que a Xunta ten en diversos concellos galegos.
Deste xeito, tanto o alumnado da UDC como doutras universidades coas que se chegou a un acordo, poderán acudir, previa solicitude, aos espazos acondicionados, que no Campus de Esteiro-Ferrol é o Edificio de Apoio ao Estudo.
Poderán facer uso das instalacións da UDC tanto o alumnado propio como o procedente das universidades de Santiago de Compostela, Vigo, Cantabria, Castilla-La Mancha, Extremadura, Les Illes Balears, La Rioja, Oviedo, País Vasco, Pública de Navarra, Zaragoza, Burgos e Valladolid.
A UDC subscribiu tamén un acordo coa Axencia para a Modernización Tecnolóxica de Galicia (Amtega) e a Federación Galega de Municipios e Provincias (FEGAMP) para que o alumnado universitario poida realizar os seus exames online nas aulas da Rede CeMIT. Esta Rede está integrada por 98 aulas presentes en 53 comarcas de Galicia. A ocupación das aulas será por orde petición, ata completar aforo.
Facilitar a realización de exames online en espazos wifi forma parte do Plan UDC de apoio ao estudantado promovido pola Vicerreitoría de Estudantes, Participación e Empregabilidade que dirixe a profesora María José Lombardía, e contempla varias medidas extraordinarias que poden verse na páxina web: https://www.udc.gal/gl/covid-19/plan-de-apoio-ao-estudantado/ na que tamén están os formularios para facer as reservas dos espazos wifi.
