A presidenta da Asociación Sociocultural ASCM, Paula Gárate, e o edil de mobilidade e urbanismo do Concello de Ferrol, Julián Reina, reuníronse esta mañá na Sede da ASCM para abordar cuestións importantes en materia de accesibilidade. O concelleiro avanzou a implantación de importantes melloras para a mobilidade das persoas con mobilidade reducida.
A ASCM leva anos reivindicando a necesidade de potenciar o atractivo turístico dos areais ferroláns, acometendo melloras en materia de accesibilidade. Desde a asociación de persoas con discapacidade considérase fundamental que as persoas da zona e potenciais visitantes poidan gozar dunha contorna de ilusión como son as praias ferrolás.
Esta mesma mañá, Julián Reina avanzou a ASCM que o Concello adquiriu dispositivos para mellorar a experiencia das persoas con mobilidade reducida nos nosos areais: bastóns, cadeiras anfibia ou andadores. O colectivo de persoas con discapacidade poderá beneficiarse, deles, a partir da próxima tempada de praias.
O edil anunciou, así mesmo, que o Concello de Ferrol realizará accións sobre as paradas de autobús da cidade, dotándoas de maior accesibilidade. A Asociación Sociocultural ASCM xa presentara, en 2017, un estudo pormenorizado, a este respecto, á administración ferrolá.
Reina comprometeuse a prestar especial atención ás marquesinas situadas en localizacións sensibles para o colectivo: hospitais e centros de saúde e edificios administrativos. As medidas foron recibidas con entusiasmo por ASCM que se brindou para colaborar en todo aquilo que se lle requira desde o concello ferrolán.
