O Concello de Ferrol presentou esta mañá o programa do Entroido 2023, que se celebrará os días 19, 20 e 24 de febreiro, e que xa se pode consultar na web municipal. O concelleiro de Cultura, Antonio Golpe, explicou esta mañá que para este ano o Concello ten preparado un “completo programa de actividades, que incluirá os aspectos máis tradicionais e algunha novidade”.
Comezará o domingo 19, ás 17 horas, cunha festa infantil na praza de Armas, con obradoiros de máscaras e pintacaras, contacontos e moito humor. O luns 20 instalarase unha filloeira na praza de Armas que funcionará de 12 a 14.30 e de 17.30 a 21 horas.
No pasarrúas, que sairá da praza de España ás 18 horas, participarán un total de 14 comparsas, o dobre que o pasado ano. Serán: Os Colludos, Os Argalleiros, Paso a paso, Vide vindo, A Canteira, ANPA Belén, Xoaninas, A revolta de Trasancos, Troupele troupele, Travesía migratoria, OJE Ferrol, Semente de Trasancos, Os Parrandolos e Os Scratchados. Os Caralletas participará como grupo e Como baila como parella. As comparsas participantes optarán a premios en metálico, segundo a valoración do xurado. O primeiro premio é de 630 euros; o segundo de 620 euros; e o terceiro de 610 euros. Así mesmo, cada un dos premiados recibirá un diploma acreditativo e fotografía.
O percorrido seguirá pola rúa Real, Arce, Amboage e Dores ata a praza de Armas, onde se celebrará a Gala do Entroido. O inicio está previsto para as 19 horas, aproximadamente. Haberá un concurso para comparsas, grupos, parellas e disfraces individuais. Para rematar, o venres 24 de febreiro terá lugar na praza de Ultramar o enterro da Sardiña. As comparsas comezarán un percorrido polo barrio ás 20 horas e ás 23 horas será a queima da sardiña. Está previsto que despois as comparsas prolonguen a festa polas rúas do barrio e establecementos da zona.
