Durante a noite do venres ao sábado, persoal de Urbaser solicitou a presenza da Policía Local na rúa Real ao detectar bolsas de lixo depositadas na vía pública e non no interior dun colector, como establece a ordenanza. Os axentes que atenderon o requirimento descubriron no interior varios documentos nos que figuraba a identidade dun home e dunha muller.
Situacións similares repetíronse durante esta pasada noite, cando unha patrulla do 092 identificou a tres persoas que depositaron os refugallos fóra do lugar axeitado. Nos tres casos os feitos producíronse na rúa Magdalena. As normas municipais recollen a obriga de depositar os residuos urbanos nos contedores habilitados a tal fin. Os incumprimentos están recollidos como infraccións de carácter leve, que implican sancións de ata 750 euros.
