O Concello de Ferrol puxo en marcha o pasado sábado unha gran recollida de produtos para doar ao Banco de Alimentos Rías Altas e deste modo contribuír ao aumento das súas reservas. Desde entón retiráronse máis de 2.600 quilos de produtos doados polas persoas que acoden aos establecementos participantes —identificados co cartel indicativo— e mercan alimentos para o banco.
No total xa retirado están incluídos os 548 doados pola cadea Alcampo. Durante esta semana e a próxima seguirán participando Lidl e Eroski e durante un mes Carrefour, Supercor, Gadis e os mercados municipais da Magdalena, Recimil e Caranza. Pola súa banda, se ben Mercadona non participa directamente na campaña, realizará unha doazón cos produtos que escaseen tras finalizar a gran recollida.
Unha campaña sen voluntarios
Nesta ocasión, e como consecuencia das restricións sanitarias motivadas pola covid-19, a campaña de recollida de alimentos desenvólvese sen apenas voluntarios nos establecementos, o que dificulta que os clientes coñezan a iniciativa, segundo indicou a concelleira de Benestar Social, Eva Martínez, “pero a sociedade ferrolá é moi solidaria, xa o demostrou en numerosas ocasións”, apuntou, e “agradecemos unha vez mais a súa resposta para axudar aos máis vulnerables da nosa cidade”. Só no día de onte recolléronse preto de 600 quilos de alimentos.
O Banco de Alimentos axuda a preto de 4.000 persoas a través das 40 asociacións ás que subministra alimentos. De novo, é a Agrupación de Voluntarios de Protección Civil (AVPC) a encargada de recoller os alimentos dos establecementos participantes e trasladalos á nave do banco, no polígono industrial da Gándara. As súas necesidades máis inmediatas son leite, colacao, galletas, conservas, aceite, fariña, legumes e azucre, entre outras.
