O presidente da Xunta, Alberto Núñez Feijóo visiou hoxe Ferrol para informar sobre as políticas de xestión do Ingreso Mínimo Vital que está levando a cabo o goberno galego. Durante a súa estadía na cidade aproveitou a visita para destacar e agradecer o compromiso dos profesionais e voluntarios da Cociña Económica de Ferrol, unha entidade que cumpre 129 anos de existencia e que tan só en 2019, serviu 60.000 racións de comida a máis de 600 persoas.
Ao respecto apelou aos principios de «solidariedade e xenerosidade que sustentan esta institución, garantindo o compromiso do Goberno galego coas entidades sociais». Así, salientou que na última década a Xunta investiu un millón de euros en mellorar as instalacións da Cociña de Ferrol, coa reforma da cuberta, a compra de desfibriladores, a reforma da instalación eléctrica ou o pintado da fachada.
Feijóo concluíu anunciando que nas vindeiras semanas reunirase co alcalde da cidade para avaliar a situación económica da comarca e, especialmente, do naval. “Unha xuntanza para priorizar as cuestións máis importantes desta lexislatura e para poñer data ao traballo que non temos no estaleiro público de Ferrol”, dixo, incidindo en que se o sector naval non funciona, a comarca tampouco.
Pola súa banda, o presidente da xunta directiva da Cociña Económica de Ferrol, Antonio Tostado Naveiras, agradeceu o apoio do Goberno galego no proceso de rehabilitación do edificio e o compromiso coa labor que realiza esta entidade, un apoio, recalcou, que se incrementou desde a pandemia.
