O presidente da Xunta e candidato do PPdeG á reelección, Alberto Núñez Feijóo, visitou hoxe Ferrol para facer un balance das actuacións do seu goberno na cidade e valorar a actual situación que atravesa o municipio.
Un dos puntos nos que máis énfase puxo o lider dos populares galego foi na crise naval. Feijoo asegurou que, «mentres non se poidan iniciar as fragatas F-110, o Goberno central ten o compromiso e a obrigación de contratar un barco polo importe do comprometido» nos Orzamentos Xerais do Estado de 2018 e, desta forma, «darlle traballo a Navantia».
Ademais, lembrou ao Executivo de Pedro Sánchez que «non se pode pechar a central térmica máis grande de España, de 1.400 megawatts», en relación á planta de Endesa, nas Pontes. «E que non se esqueza, por moito que haxa agora no Goberno membros do mesmo que a súa obsesión foi pechar Reganosa -en alusión á ministra de Traballo, Yolanda Díaz- e que non improvise, porque pechar esa empresa de gas é un golpe non só a toda esta zona, senón que tamén á capacidade de reparacións do estaleiro de Navantia», esgrimiu, antes de engadir que, «cando non hai traballo, ou non hai traballo suficiente, non é bos que aínda encima a xente dedíquese a desmantelar as industrias que hai».
No capítulo de infraestruturas, apuntou que se atopa en redacción o proxecto para a reformulación da Vía de Alta Capacidade (VAC) da Costa Norte, o tramo entre a AG-64 (Ferrol-Vilalba) e Sanguiñeira, ambos en San Sadurniño ou a mellora da AC-566 entre Valdoviño e Cedeira. E en canto ao ferrocarril, asegurou que «non se vai a renunciar á chegada do tren de alta velocidade a Ferrol e que se están dando os primeiros pasos coa estación intermodal».
Finalmente, Feijóo destacou a ampliación do Hospital Arquitecto Marcide, cun investimento de 56,8 millóns de euros para acometer dous novos edificios e pasar de 43.000 a 67.000 metros cadrados, deixando así «un hospital para os próximos 50 anos».
