O goberno socialista de Ferrrol presentou esta mañá ao resto de grupos políticos proposta de bases do programa de subvencións a clubs e entidades deportivas municipais para o fomento e promoción da educación física e o deporte para este ano.
O documento, que deberá aprobarse en pleno, recolle que o Concello de Ferrol concederá axudas por un importe total de 130.000 euros. Entre os gastos subvencionables están os realizados este ano en publicidade e difusión, de transporte e aloxamento, de persoal e asistencias técnicas, gastos de materiais consumibles específicos das actividades, os relacionados coa competición e a práctica deportiva e
gastos de xestión ou de subministracións, entre outros. O importe da subvención non poderá superar o 40 % do orzamento das actividades e non poderá pasar de 10.000 euros.
A valoración das solicitudes corresponderalle a un órgano colexiado, a Comisión de Valoración, o cal será o encargado de formular a proposta de concesión. Estará composto polo concelleiro Golpe, un representante de cada grupo municipal, un técnico da concellería de Deportes e un funcionario do negociado. A comisión avaliará as solicitudes e emitirá un informe e as subvencións concedidas notificaranse aos interesados e publicaranse no taboleiro de anuncios do Concello.
