O Concello de Ferrol autorizou onte a continuación das obras que se están a desenvolver nos edificios 16 da rúa Narón e 1-4 da rúa 10 de Marzal, no barrio de Recimil. Estes traballos permaneceron parados durante a semana pasada, xa que se desenvolven en inmobles habitados, cos posibles riscos que iso podería implicar na actual situación de epidemia. Por ese motivo, a concellería de Urbanismo solicitoulle á dirección de obra un informe sobre as condicións necesarias para que a empresa adxudicataria seguise coas labores de rehabilitación das fachadas e cubertas.
Á vista das conclusións deste documento, é posible levar a cabo algunhas das actuacións pendentes, coma a reposición do pavimento exterior da canalización eléctrica. Tamén a retirada de andamios, coa adopción de medidas adicionais, xa que se considera que xeraría máis riscos o mantemento destes elementos que desmontalos. Por outra parte, minimizarase a concorrencia de quendas de operarios.
Os traballos que sí se suspenden son os que se realizan dentro dos edificios ou nas zonas comúns, como execución de diversas instalacións interiores ou a colocación de fiestras, para evitar contactos dos traballadores cos residentes.
