O Concello de Ferrol, a través da concellería de Mercados vén de acordar que a venta ambulante de productos agrícolas de tempada volva ao mercado municipal de Recimil a partir do próximo luns, 8 de xuño, coincidindo co inicio da fase 3 da desescalada. Deste modo levantarase a suspensión que actualmente pesa sobre este tipo de autorizacións con motivo do decreto de estado de alarma.
Os vendedores deberán respectar os 6 metros de distancia entre os postos, podendo reducirse a 4 entre laterais, e garantir que se poidan manter os dous metros de seguridade entre clientes e entre estes e os vendedores. Ademais, desde a concellería apúntase que os responsables dos postos deberán ser especialmente escrupulosos coa limpeza dos mesmos e non deberán acumular os refugallos nas inmediacións, debendo depositalos, tan pronto como se produzan, nos depósitos do lixo.
Pola súa parte, os compradores non poderán manipular os productos á venda. Tanto a Policía Local como o departamento de Seguridade supervisarán o cumprimento destas medidas, así como a correcta distribución dos postos.
