O local social de Serantes acolleu esta tarde o acto de acendido de Nadal no rural, un evento que o Concello celebra por primeira vez. O rexedor ferrol, Ángel Mato, acudiu ao evento acompañado pola concelleira de Zona Rural, Ana Lamas, e multitude de persoas, nun evento que da resposta á demanda por parte da veciñanza de incluír este ámbito do municipio nos actos tradicionais de acendido do alumeado de Nadal. Deste modo, ás 40 arcadas que cada ano se colocaban no rural, nesta ocasión sumáronse outras 80, o que suman un total de 120 elementos.
Ademais do acto de acendido das luces, que incluíu a iluminación dunha árbore, o evento contou coa actuación da rondalla de mulleres Santa Uxía de Mandiá e a visita de Papá Noel acompañado dunha elfa, que recolleron as cartas dos pequenos que se atopaban no local da asociación veciñal. O acto rematou cunha festa na que os asistentes gozaron de pinchos e da actuación musical de Jorge Latino.
