O concelleiro de Seguridade, Germán Costoya, anunciou esta mañá que o Concello de Ferrol vén de intensificar a desinfección nos exteriores de hospitais, ambulatorios e residencias de maiores co fin de “seguir loitando” contra a propagación da Covid-19 entre a poboación, polo que desde onte mesmo os labores de hixienización se están a levar a cabo a diario e non en días alternos, como ata agora.
Desde modo, tres efectivos do corpo de Bombeiros de Ferrol dotados con equipos de protección individual (EPI) e un camión bomba pulverizan a diario solución desinfectante nos accesos aos ambulatorios de Plaza de España, Serantes e Caranza, ao Edificio Social da concellería de Benestar Social e ás residencias de maiores. Tamén nos exteriores do albergue de Caranza, do Complexo Hospitalario Universitario de Ferrol (CHUF) e do Centro de Atención a persoas con discapacidade (CAMF), entre outros espazos.
“Executaranse nos horarios de menor afluencia de persoas para evitar molestias”, explicou Cosyota, e indicou que o fin de reforzar os traballos de desinfección “é poñer todos os medios que temos no Concello para protexer aos nosos veciños e seguir loitando entre todos contra a propagación da covid-19”.
Máis de 800 intervencións durante o estado de alarma
O Corpo de Bombeiros de Ferrol realizou durante o tempo que durou o estado de alarma un total de 820 desinfeccións en diferentes espazos da cidade. No mes de marzo e abril sumaron 383, en maio outras 374 e en xuño, ata a finalización do estado de alarma, fixéronse un total de 63 intervencións.
