Axentes da Policía Local interviñeron esta fin de semana no rescate de dúas mulleres nos seus respectivos domicilios. Esta mesma madrugada, arredor das dúas e cuarto, a Cruz Vermella púxose en contacto co 092 para informar de que unha veciña de 93 anos caera no interior do seu domicilio, na avenida do Doutor Fleming, e non se podía mover.
De inmediato enviouse unha patrulla ao lugar, pero, tras comprobar que resultaba imposible acceder á vivenda, solicitouse a axuda dos bombeiros. Estes entraron no inmoble por unha fiestra, con axuda dunha escada. Localizada a muller no seu cuarto, persoal do 061 prestoulle unha primeira asistencia, antes de trasladala ao hospital Juan Cardona.
O outro incidente destas características produciuse onte pola tarde. Neste caso foi o 061 o que reclamou a axuda da Policía Local para entrar nun piso da rúa do Deporte. A muller que vive nel, unha persoa maior, non respondía ás chamadas. Unha veciña que dispón de copia das chaves facilitoullas á patrulla. Nada máis entrar, os axentes atoparon á muller no chan. Estaba consciente, aínda que non se podía mover. Explicou que caera había arredor dunha hora. O persoal sanitario trasladouna a un centro médico.
