O Concello de Ferrol aínda mantén aberto, ata o día 21 de outubro incluído, o prazo de inscrición para participar un ano mais na formación que ofrece a pais e nais de Ferrol a Escola municipal de Familias, unha iniciativa posta en marcha pola Administración local que busca contribuír á mellora das habilidades educativas, de xestión e de comunicación familiar e reforzar as súas competencias relacionadas coa educación dos seus fillos.
Trátase de crear un espazo de “reflexión e de intercambio” de experiencias no que se abordan asuntos como a comunicación familiar e os estilos educativos, as normas e límites, a adolescencia, as drogas e as adicción en xeral, tal e como lembrou a concelleira de Benestar Social, Eva Martínez Montero.
A edición deste curso escolar contará con tres módulos. O primeiro, para o que está aberto o prazo de inscrición, estará dedicado á prevención das condutas aditivas e desenvolverase os días 26 de outubro e 2, 9, 16, 23 e 30 de novembro de 2022, de 17 a 18:30 horas. O segundo abordará a sexualidade na xuventude e o terceiro o acoso escolar, unha temática que a Escola de Familias abordará por primeira vez.
Os interesados en participar no primeiro módulo poden anotarse ata o 21 de outubro incluído na asociación Asfedro a través do correo electrónico [email protected] indicando nome e apelidos, número de fillos e idade dos mesmos, teléfono de contacto e dirección de correo electrónico. Tamén se pode formalizar a inscrición completando o formulario no enlace https://cutt.ly/8Bwr6u5.
Cambio de localización
Este ano a Escola de Familias trasladarase á Casa Solidaria do Concello de Ferrol (ra Velázquez, 44), un espazo “máis céntrico que o Edificio Social, onde se viña desenvolvendo, que permitirá asistir a un maior número de nais e pais”, indicou a edil. Desenvolverase en colaboración co Grupo de Traballo de Infancia, Adolescencia e Familia, un órgano impulsado polo Concello de Ferrol e integrado por diversas entidades sociais.
