O Centro Social Artábria, situado na Travesía de Batallones no barrio de Esteiro, en Ferrol, sufriu na madrugada deste sábado un acto vandálico de carácter fascista. A sede da Asociación Cultural amenceu con pintadas na súa entrada, incluíndo varias esvásticas e a alteración dunha bandeira palestina previamente pintada na persiana.
Segundo informou a propia entidade, a bandeira de Palestina foi modificada con pintura en espray para simular a bandeira española, acompañada de símbolos nazis e consignas como “Arriba España”. Ademais, apareceron outras esvásticas tanto na fachada do local como nunha vivenda contigua.
Desde Artábria denunciaron publicamente os feitos e sinalaron que non se trata dun episodio illado. A entidade lembrou agresións e ataques sufridos en etapas anteriores, algúns deles vinculados a grupos ultras. Tamén apuntaron a que este tipo de accións adoitan coincidir coa Semana Santa, período no que a cidade recibe unha maior afluencia de visitantes.
Nun comunicado, o colectivo reafirmou o seu “compromiso firme na defensa dunha sociedade libre de fascismo, racismo e calquera forma de opresión”, subliñando que “non nos van intimidar” e que continuarán traballando polo tecido asociativo, a cultura popular e a solidariedade internacionalista.
Poucas horas despois do ataque, un grupo de socios, socias e persoas próximas ao centro procedeu á limpeza inmediata das pintadas, restaurando a bandeira palestina e eliminando toda a simboloxía nazi-fascista.
«Um grupo de sócios, sócias e amigos da Artábria limpárom imediatamente a bandeira da Palestina e eliminárom toda a simbologia nazi-fascista, rojigualda incluida: O turismo fascista nom nos intimida», concluiron.
Condena unánime
O Concello de Ferrol condenou o sucedido cualificándoo de “acto vandálico” e fixo un chamamento ao civismo e á responsabilidade colectiva. Pola súa banda, o BNG tamén rexeitou o ataque. O seu portavoz municipal, Iván Rivas, considerou que as pintadas reflicten “aspectos intolerables do españolismo máis rancio”, tanto pola imposición de símbolos como pola súa acción sobre a bandeira palestina.
Desde o PSOE local condenaron “enerxicamente” as pintadas, definíndoas como “actos intolerables que non teñen cabida nunha sociedade democrática” e que atentan contra os valores de convivencia, respecto e diversidade.
