A Xunta acaba de iniciar as obras de mellora dos aparcamentos e as vías de acceso aos hospitais de Ferrol. Concretamente, estas actuacións levaranse a cabo nos accesos aos hospitais Naval, Arquitecto Marcide e Nóvoa Santos, supoñendo un investimento de 200.000 euros e cun prazo de execución total de 5 meses.
Estas obras forman parte do contrato máis amplo co que se impulsan acondicionamentos similares nas contornas de centros hospitalarios públicos da provincia, contando cun investimento global de 1 millón de euros. No caso de Ferrol, os traballos céntranse nos viarios e aparcadoiros, fundamentalmente na renovación do firme e na reparación das beirarrúas deterioradas.
O principal obxectivo que se pretende acadar con estas reformas é reforzar a seguridade viaria e a accesibilidade nos contornos destes centros hospitalarios, favorecendo a mobilidade tanto de pacientes como de todo o persoal sanitario que se achega cada día ás instalacións destes hospitais ferroláns.
Hospital Naval, Arquitecto Marcide e Novoa Santos
As obras no Hospital Naval implicarán a renovación do firme do vial perimetral, de preto de 1 quilómetro de lonxitude, ademais de actuar sobre uns 5000 metros cadrados dos aparcadoiros. No caso dos hospitais Arquitecto Marcide e Nóvoa Santos, as actuacións prevén a renovación do firme nos treitos máis deteriorados.
Ademais a intervención inclúe a mellora da sinalización interior e exterior dos tres hospitais.
A execución destes traballos está coordinada cos responsables do Sergas, analizando as necesidades de actuacións, polo que as obras realizaranse de maneira compatible cos equipos técnicos sanitarios para interferir o menos posible na actividade hospitalaria.
No caso concreto das actuacións no centro hospitalario Arquitecto Marcide serán coordinadas coas obras de ampliación que están en execución desde o pasado outono.
