A concellería de Benestar Social publicará mañá as listas provisionais de admitidos e excluídos das axudas á escolarización e as becas de comedor escolar para o curso 2020-2021. Ao longo da mañá, poranse a disposición dos interesados no taboleiro de anuncios do Concello, tanto no do pazo municipal como no da sede electrónica –www.ferrol.gal/Sede/TaboleiroAnuncios-.
Tras a publicación, o mércores abrirase un prazo de 10 días hábiles para alegar ou subsanar algun erro que evite a aprobación de ditas axudas. Para presentar a documentación no Rexistro municipal non será necesario solicitar cita previa. Así o acordaron os concelleiros de Benestar Social, Eva Martínez Montero, e de Organización Interna, Julián Reina, coa intención de axilizar este trámite do mesmo xeito que se fixo durante o prazo de presentación de solicitudes.
Dende o Concello avanzaron que se chegaron a recibir 505 peticións de becas comedor e 939 de axudas escolares. No primeiro caso foron concedidas 204 e 301 están pendentes de subsanación ou recurso. No tocante ás segundas, xa están a probadas 404. O resto dos solicitantes -535- deberán achegar documentación para completar o expediente ou alegar, segundo corresponda.
As axudas á escolarización están dirixidas aos menores de idade que residan en Ferrol e estean matriculados nun centro de ensino do municipio para cursar educación infantil, primaria, secundaria, bacharelato, formación profesional básica ou formación profesional de grao medio. A contía ascende a 95 euros por neno para a adquisición de material escolar, incluído o informático, ou roupa deportiva. O orzamento destinado a estas axudas ascende a 90.000 euros.
