O Concello de Valdoviño vén de sacar a contratación as obras de extensión da rede eléctrica para dar subministro á estación de bombeo situada na Cubeta, en Meirás. Uns traballos a licitación cun orzamento de 41.649,24 euros a financiar con cargo aos fondos do POS Adicional 2019.
O prazo de execución das reformas é de 3 meses e o periodo para que as empresas interesadas presenten as súas ofertas está aberto ata o 30 de outubro, e tatno os pregos como o procedemento poderán consultarse na plataforma de contratación do sector público.
Melloras no saneamento de Meirás
A actuación posibilitará a posta en marcha da estación de bombeo da Cubeta, o que permitirá ampliar o servizo de saneamento aos lugares de Fornos e Pallotas, na parroquia de Meirás. Para iso, será preciso a instalación das correspondentes bombas.
De feito as bombas que había nun pasado foron sustraídas e o propio Consistorio tivo que tramitar a correspondente denuncia ante a Garda Civil. Aínda así estas pezas nunca chegaron a funcionar posto que a instalación carecía de suministro eléctrico, unha situación que tamén se remediará con esta nova e esperada intervención.
