Moeche xa marcou no calendario a súa VIII Feira do Queixo: será o domingo 15 de marzo, na Nave do Mercado. A cita chega cun feixe de novidades e coa intención de seguir medrando como escaparate para as queixarías artesás e para un produto que, edición tras edición, atrae público de dentro e fóra do municipio.
O Concello está a pechar o programa, que se fará público proximamente, pero a inscrición de postos xa está aberta. As solicitudes deben tramitarse a través da Sede electrónica. A feira conta tamén con cartel renovado, cunha nova imaxe deseñada por Juanlu Nacha, e incorpora este ano unha novidade destacada: a presenza do Mercado de Artesanía Agroalimentaria da Deputación da Coruña.
A feira mantén o seu enfoque: promover o consumo e a cultura do queixo e poñer en valor o traballo das queixarías —pequenas e grandes— como peza clave do desenvolvemento sustentable no rural. O recinto feiral volverá encherse de queixos artesáns, cunha mostra de DOP galegas e doutras zonas do Estado, ademais de produtos internacionais que participan desde as primeiras edicións, con presenza de Francia, Italia e Suíza.
Un mercado artesán ao pé da nave
Entre os avances desta edición, o Concello confirma a instalación do Mercado de Artesanía Agroalimentaria da Deputación da Coruña, que se ubicará nunha gran carpa xunto á nave e reunirá postos de alimentación artesá.
A colaboración foi concretada nun encontro entre a alcaldesa, Beatriz Bascoy, e a concelleira de Desenvolvemento Local e deputada provincial, Cristina García, co vicepresidente da Deputación e deputado de Promoción Económica e Turismo, Xosé Regueira. Segundo trasladou a institución provincial, o mercado completarase con showcooking e tamén con propostas musicais a través da Rede Cultural 2026. A Deputación suma así a súa participación no marco da campaña “A paisaxe que sabe”.
Desde o Concello, a rexedora agradeceu o apoio da Área de Turismo da Deputación, destacando que “enriquece a oferta” nunha xornada de grande afluencia e contribúe a dar visibilidade ao patrimonio cultural e ás feiras locais.
Música, catas e obradoiros
A programación cultural, musical e gastronómica será outro dos eixos da xornada. A falta de ultimar algúns detalles, o Concello adianta que haberá actuacións musicais, catas dirixidas, obradoiros e venda de produto agroalimentario fresco e elaborado, ademais doutras novidades que se irán anunciando nos próximos días. Se queda espazo dispoñible ao pechar as inscricións, tamén se abrirá a porta a expositores de artesanía e outros artigos.
Ao longo deste mes iranse desvelando máis contidos, incluída a queixaría convidada desta edición, que se sumará a nomes que xa pasaron pola feira e seguen presentes, como o Idiazabal ou o Gamoneu, entre outros.
Prazo para solicitar posto: ata o 8 de febreiro
O Concello asegura que nos últimos días medrou o interese por participar nunha feira xa consolidada como referencia do sector. Terán preferencia as queixarías que xa asistisen noutras edicións e os produtores locais, que contan con espazo reservado.
O prazo para solicitar posto —con prioridade para os de queixos artesáns— estará aberto ata o 8 de febreiro. Unha vez confirmada a solicitude pola área de Desenvolvemento Local, deberá abonarse a cota: 30 euros para postos no interior da nave e 20 euros para o resto.
