A Concellería de Urbanismo de Mugardo porá en marcha un servizo de supervisión de terrazas para todos os hostaleiros e hostaleiras do municipio que o desexen, co obxectivo de colaborar e supervisar a instalación das terrazas na reapertura dos negocios.
O responsable de urbanismo e alcalde Juan Domingo de Deus, informa de que esta é unha máis das iniciativas desenvolvidas conxuntamente coa hostalaría, coa que este goberno municipal está a colaborar activamente na procura do mantemento da actividade económica e os empregos neste sector.
Nesta nova iniciativa, o departamento de urbanismo asesorará aos hostaleiros e hostaleiras tanto na lexislación aplicable como nas medidas que poderían adoptar para a correcta instalación das terrazas e evitar así posibles multas ou sancións. Os interesados deberán chamar ao teléfono do departamento de urbanismo 981 470 338 (extensión #2026) de luns a venres, de 9.00 a 14.00 horas
En colaboración cos departamentos de Obras e Servizos e o de Desenvolvemento e Emprego, xa se desenvolveu por parte do Concello un plan de ampliación de espazos públicos habilitados para a instalación de terrazas, incluso acudindo a otras administracións, así como a preparación dunha liña de axudas que permita afrontar as perdas derivadas do estado de alarma.