Reganosa iniciou hoxe un proceso de captación de persoal para incorporar ao seu persoal a dez novos enxeñeiros. Cando a selección conclúa, nun par de semanas, o grupo pasará a contar con 150 traballadores, o número máis alto desde a fundación da compañía en 1999. Son máis do dobre que ao peche de 2015 (70). Reganosa incrementará deste xeito outro 7,1 % o volumen da súa plantilla.
A empresa busca nestes momentos a dez titulados superiores en enxeñería industrial, química, naval ou equivalente, como se indica na oferta cuxos detalles os aspirantes poden consultar accedendo ao perfil corporativo en Linkedin e a través da web www.reganosa.com. Os contratados seguirán un intenso plan de formación integral que os levará a coñecer o proceso produtivo e as diferentes liñas de negocio do grupo.
O persoal do holding compóñena os traballadores de Regasificadora do Noroeste, que é xestor da rede de transporte gasista ( TSO) e propietario da terminal de gas natural licuado do porto de Ferrol; de Reganosa Servizos, que opera a nivel internacional; e de Reganosa Malta, que pende da anterior sociedade e dedícase a explotar e manter a regasificadora de Delimara.
A maioría dos empregados teñen o seu posto en Mugardos. Os restantes distribúense, principalmente, entre a terminal de GNL de Malta, a planta da o- Zour (Kuwait) e as oficinas que en Bruxelas (Bélxica) posúe Entsog, un organismo centrado en mellorar a cooperación entre os TSO europeos. Reganosa conta cun persoal novo, cunha media de idade 38,8 anos de media e o 96,9% son titulados medios ou superiores.