O Padroado de Deportes de Narón habilitará un prazo de preinscrición nunha listaxe de espera das Escolas Deportivas de natación, natación terapéutica, ioga, pilates, ximnasia de mantemento… que se desenvolven tanto no complexo polideportivo da Gándara como noutros centros da cidade.
O edil de Deportes, José Oreona, explicou que na actualidade e debido ás limitacións de aforo establecidas os cupos destas Escolas están cubertos, pero «queremos dispoñer dunha listaxe para poder cubrir vacantes no caso de que se rexistren ou para o momento no que a situación actual de pandemia permita ampliar aforos».
Lista de espera a partir do 21 de setembro
As veciñas e veciños de Narón posuidoras do Bono Familiar ou usuarias e usuarios que estiveron inscritos nos cursos de natación para bebés e cumpren tres anos antes de outubro debendo cambiar de actividade, terán que anotarse nesta lista de espera a partir do 21 de setembro, se ben o prazo comezará o 1 de outubro para as persoas doutros concellos, tal e como indicou Oreona.
As persoas que na tempada 2019-2020 estiveron inscritas nas Escolas Deportivas manteñen activa a inscrición na mesma actividade no caso de que non presentasen ou presenten a baixa –no Rexistro Xeral do Concello ou a través da Sede Electrónica- antes do 15 de setembro.
O edil naronés avanzou ademais que na presente tempada as Escolas de natación infantil comezarán un só día á semana, debido á redución de aforos pola pandemia, polo que se aplicará a correspondente redución da taxa. Esta situación, apuntou, podería afectar a algúns grupos de Natación para adultos que pola ocupación actual se precisen desdobrar.
Inicio das actividades deportivas
En canto ás actividades deportivas, o inicio das mesmas está previsto en diferentes fases: o 1 de outubro prevese o inicio de Natación terapéutica, Natación para bebés, Grupos de diversidade funcional, Pilates, Ioga e Ximnasia de mantemento.
Uns días máis tarde, concretamente o 8 de outubro, comezará Natación infantil -3 a 14 anos- e Natación de adultos. Finalmente, a reapertura do baño libre -que comezará ás 8.15 horas- na piscina polivalente prevese para este mesmo mes de setembro, o día 14, debendo concertar cita previa para asistir chamando ao número de teléfono 981 337 700 -extensión 2503-. Todas estas actividades desenvólvense no complexo polideportivo da Gándara.
A data de inicio das actividades que se imparten fóra das citadas instalacións da Gándara está actualmente sen determinar, indicou o concelleiro naronés. As persoas interesadas en recibir máis información poden chamar ao número de teléfono 981 337 700 -ext. 2503-.
