O Concello de Narón invertirá unha partida de 15.000 euros á Confraría de Pescadores e Mariscadores de Ferrol despois do acordo enrtre a patroa maior da entidade, María Isabel Maroño, e a alcaldesa de Narón, Marián Ferreiro. Así, a administración local contribuirá aos gastos de funcionamento da citada entidade, apoiando o desenvolvemento sostible da súa actividade.
A Confraría de Pescadores e Mariscadores de Ferrol adquire en virtude a este convenio unha serie de compromisos co Concello de Narón. Dese xeito, ofrecerá funcións propias como órgano de consulta e colaboración coa administración e tamén defenderá os intereses profesionais do colectivo, a maiores de desenvolver funcións que lle poida ocasionar en determinado momento a administración pública.
Ferreiro destacou que se trata dunha actividade de interese público que engloba a unhas oitocentas familias e que a través da aportación municipal «cooperarase para o mantemento dos postos de traballo neste sector moi castigado na comarca, mantendo unhas vías de colaboración que dende o goberno local xa tiñamos co colectivo, que desempeña unha encomiable tarefa vencellada ás actividades produtivas da nosa ría».
