A alcaldesa da cidade, Marián Ferreiro, dirixiu un escrito esta mañá ao responsable da Xefatura territorial de Educación na Coruña, Indalecio Cabana, solicitando a súa intervención para rematar definitivamente a obra que a administración autonómica impulsou na Escola do Val, do CRA de Narón.
A Xunta presentou no Concello un proxecto que incluía “o traslado do conxunto de xogos infantís, composto por columpios, xogos de muelle, tobogáns e unha cerca de madeira, incluíndo ese proxecto a colocación de todos estes elementos nunha nova ubicación, que así se orzamentou no proxecto presentado no departamento municipal de Urbanismo”, tal e como recordou Ferreiro.
A rexedora local xa advertiu no pleno do pasado mes de setembro que os traballos non están rematados, á vista de que non se colocaron os xogos do parque infantil da Escola do Val, que continúan apilados nunha zona do recinto escolar.
“Ao feito de incumprir o especificado no seu propio proxecto isto supón un grave risco para as nenas e nenos que acuden a ese centro unha vez iniciadas as clases, porque poden sufrir danos se se achegan á zona na que está apilado o material, e tamén lles impide desfrutar dunha serie de xogos cos que contaban antes de executar a Xunta os citados traballos”.
Ferreiro incidiu na importancia de acometer canto antes os traballos pendientes “debido a que na actualidade as clases xa comezaron e as aulas están operativas, polo que é preciso que o alumnado poida tamén facer uso da zona de xogos, tal e como viña facendo no curso anterior”.
