A alcaldesa da cidade, Marián Ferreiro, instou á Xunta de Galicia a “establecer as medidas oportunas para poder reabrir canto antes as escolas infantís”. A rexedora local animou ao portavoz popular do consitorio naronñes a “esixir á administración competente, que neste caso é a Xunta de Galicia e está gobernada polo PP, que autorice a reapertura das escolas infantís, ao ser da súa competencia, e ofrecer deste xeito ás veciñas e veciños non só de Narón senón de toda Galicia, un servizo básico para que poidan conciliar a súa vida persoal e profesional”.
Ferreiro recalcou que “dende o goberno local estamos en disposición de reabrir as tres escolas infantís municipais da cidade no momento en que a administración autonómica permita facelo e esperemos que a Xunta faga o propio coa escola infantil que xestiona en Xuvia”.
A maiores, dende Terra Galega presentarase ao pleno de finais deste mes, tal e como avanzou a rexedora local, unha moción na que se instrará á Xunta a elaborar un protocolo consensuado cos representantes da comunidade educativa para garantir a seguridade na volta ás aulas ante a crise da Covid-19 e no que se inclúan varias medidas encamiñadas a ese fin. “É imprescindible que as familias coñezan con tempo suficiente as medidas que se van a adoptar dende a administración autonómica en canto a aforo nas aulas, reforzo de persoal docente e medidas de protección contra a Covid-19 de cara ao inicio do novo curso escolar”, subliñou Ferreiro.
