O Concello de Naron vén de solicitar á Consellería de Medio Ambiente dúas subvencións por un importe conxunto de 28.522 euros para materializar na cidade dous proxectos: un deles consiste na implantación e seguemento dunha campaña de compostaxe domiciliaria para promover a reciclaxe en orixe, e a outra é para elaborar o Plan de Acción para o Clima e a Enerxía Sostible (PACES) do Concello, tras adherirse ao Pacto de alcaldías para o clima e a enerxía sostible.
A campaña de compostaxe domiciliaria se trata dun proxecto “a través do que se impulsarán actuacións destinadas ao tratamento “in situ” dos bioresiduos de orixe domiciliaria, dirixida a un centenar de persoas, tanto particulares como grandes xeradores”. O proxecto, valorado en 18.022 euros, desenvolveríase en varias fases, comezando pola realización dunha campaña de sensibilización e difusión de material informativo para, a continuación, seleccionar aos participantes, ofrecerlles información e entregar os kits de compostaxe, que serían 100 unidades de composteiros e outras tantas de aireadores, termómetros e caldeiros. Posteriormente realizaríanse controis “porta a porta” para levar a cabo unha campaña de seguemento que se completaría con asesoramento telefónico continuado durante a duración da mesma.
A segunda das subvencións solicitadas á Consellería de Medio Ambiente, de 10.500 euros, destinaríase a elaborar o Plan de Acción para o Clima e a Enerxía Sostible (PACES), que a través de diferentes fases permitiría redactar un inventario de emisións de referencia de CO2 e analizar os riscos e vulnerabilidades, propoñendo actuacións acordadas con diferentes departamentos. “Os consumos enerxéticos do Concello reducíronse considerablemente nos últimos anos, e continuamos traballando nesa mesma liña, implantando a tecnoloxía led tanto na zona urbana como no rural para reducir a emisión de CO2 á atmósfera e, ao tempo, reducir gastos de mantemento e consumo”, recalcou a alcaldesa Marián Ferreiro.
