O Padroado da Cultura de Narón retomará o vindeiro mes de xullo a súa programación cultural ao aire libre. Durante o período estival o Concello dará continuidade a programas que leváronse a cabo en anos anteriores, tanto na zona urbana como na rural. Serán propostas de balde en todos os casos e das que poderán gozar tanto as nenas e nenos como as persoas adultas.
A primeira das citas será a través do programa “Verde que te quero verde”, que alcanza este ano a cuarta edición e que se desenvolverá os catro domingos do vindeiro mes de xullo en prazas e parques da cidade e que, ao igual que en anteriores edicións incluirá un espectáculo para público xeral e unha actuación específica dirixida a público infantil.
Cada unha das propostas dominicais terá unha duración aproximada de media hora e contará cunha decoración escénica propia deste programa, co que os espazos públicos serán un referente donde socializar coas veciñas e veciños, un dos obxectivos desta iniciativa.
Nos meses de xullo e agosto tamén se retomará outra proposta cultural, a de “Cine de verán”. “Un día á semana programaremos unha proxección dunha película na zona urbana e rural, prestando este ano especial atención a estes últimos núcleos, para continuar impulsando a programación cultural nas parroquias da cidade”, apuntou a alcaldesa Marián Ferreiro.
Outra das propostas será a de “Xogos populares”, que se prevé levar a cabo a partir do mes de agosto tamén en espazos públicos da cidade. As nenas e nenos poderán gozar de diversos xogos como malabares, catro en liña, pesca de botellas e tamén de obradoiros guiados por monitores que lles aprenderán como realizar algúns elementos que poderán levar para as súas casas.
