Un total de oito comparsas daranse cita este sábado, día 22, no Festival de Entroido organizado polo Padroado da Cultura de Narón. Cinco delas serán de Narón e as tres restantes doutros concellos da comarca.
A alcaldesa Marián Ferreiro avanzou que da cidade participarán as formacións Os Argalleiros, de A Gándara; Viagem ao Povo Inuit (Semente de Trasancos), de San Mateo; Troupele, Troupele, tamén de A Gándara; Os Parrandolos, de Piñeiros y Os Colludos (Asociación Cultural ASCM), de A Solaina. E de fóra de Narón sumaranse á convocatoria as comparsas A Canteira, de Neda; Os Trastes, de Valdoviño e A Revolta, de Ferrol.
O sábado ás 17.00 horas as oito comparsas concentraranse na Praza da Gándara, para saír ás 17.15 horas desde aí cara á pista polideportiva da Solaina, percorrendo as rúas Vigo, Wenceslao Fernández Flórez, as estradas da Trincheira e da Gándara e as avenidas de Santa Icía e A Solaina, coa previsión de iniciar ás 18.00 horas as actuacións das formacións na pista polideportiva da Solaina, onde se instalará unha gran carpa.
A formación Inventi Teatro será a encargada de presentar o festival, no que actuará tamén a banda musical Os Mecánicos. Cada unha das comparsas dispoñerá dun prazo de dez minutos para interpretar o seu repertorio –en galego e sobre temas locais- e as cinco participantes de Narón deben facer unha actuación na súa parroquia e noutra da cidade.
En canto ao público que asista disfrazado, optará tamén a premios para os mellores disfraces individuais, de parellas e de grupos. Para poder participar no concurso de disfraces as persoas interesadas deberán anotarse o propio sábado na pista polideportiva da Solaina. Os premios para os adultos serán cestas con produtos de Entroido e, no caso dos menores, libros e entradas para algún espectáculo do Pazo dá Cultura.