Co inminente inicio do curso escolar e en plena segunda onda de contaxios, o Concello de Neda está a distribuír estes días entre os centros educativos do municipio máis de 1.600 máscaras, un material de prevención fronte á Covid-19 que completa con termómetros para o control de temperatura.
O obxectivo é que colexios e institutos conten con máscaras de reserva nas aulas, de modo que en caso de necesidade os alumnos e alumnas poidan acceder a este material tan vital coa actual crise sanitaria. A maiores, tamén se están a entregar para o uso de docentes e persoal dos centros.
Así, e segundo as aulas, no CEIP de Maciñeira entregáronse 550 máscaras, no CEIP San Isidro, 500, e no IES Fernando Esquío, 600. A iniciativa súmase ao reparto realizado dende o inicio da pandemia entre establecementos con atención ao público, poboación máis vulnerable e veciñanza en xeral.
