Combater a soídade e o desánimo que pode provocar o confinamento forzado polo coronavirus é o obxectivo principal do novo proxecto que impulsa o Concello de Neda e que terá, nos máis novos da casa, aos seus principais aliados. O showman, cantante, actor, DJ e artista local Dani Ríos apadriña esta iniciativa e convida a nenos e rapaces a convertila nun éxito coas súas ferramentas máis eficaces: o seu talento e creatividade.
As armas contra o coronavirus son múltiples e variadas: debuxos, mensaxes de ánimo grabados co móbil, coreografías, lecturas de contos, narracións, cancións. Todo é válido para tentar dar un pouco de alegría nestes momentos a toda a veciñanza.
O Concello pide aos máis pequenos e pequenas que lle fagan chegar as súas creacións contra o coronavirus a través do correo electrónico ([email protected]), do Whatsapp (619 736 620) ou que etiqueten ao Concello en Facebook (@nedaoficial). Deste xeito, o Concello compartirá todas as mensaxes recibidas nas súas redes sociais.
